「香港有二百六十三個島，其中一個，媽媽靜靜為你收起咗。」
五年前，陳家以無法撫平小產創傷，最後選擇離家出走，開設咗名為262嘅一間小書店。
五年後嘅夏天，陳家以偷睇咗汪曼貞漏低响書店嘅背囊裡面封遺書，兩人因而展開一段熾熱嘅關係。陳家以決定帶汪曼貞重返細個爸爸會帶佢同媽媽露營嘅荒島，嗰個佢為無法出世嘅孩子靜靜收起嘅，香港第二百六十三個島，一齊向兩人各自嘅傷痛好好道別。
趁呢段關係未燃燒殆盡之前。
——— · ———
《二六二》嘅構思大約喺四年前發酵，到準備印刷同宣傳嘅時候先發現原來籌備《二六二》都將近四年啦。今次係第一次寫小說，而且仲要用粵語書寫，遇到嘅困難自然好多，但自己實在搵唔到任何抱怨嘅理由，因為能夠用母語寫作，實在係無比幸福嘅一件事情；而自己亦好清楚，呢份幸福唔係理所當然，所以自己都好珍惜今次嘅創作過程。
