．喺悠長嘅人文歷史之中，點解每個時代都會有咁多荒謬、點解人嘅內心會覺得咁孤獨？
．到底人要點樣做，先至可以搵到屬於自己嘅自由……
．即將應考 DSE 嘅間生，有一日竟然發現留醫嘅阿爸，原來寫咗十五封信畀自己；由細到大同阿爸一直都冇乜兩句，佢用十五封嘅信，串連十七本書，究竟想講啲乜呢？
．其中有封信，問到：「滄龍、翼龍、鱷魚、企鵝，邊一種係恐龍？」——當我哋細思生命嘅過往發展，我哋會發現眼前習以為常嘅事物，係驚奇處處；而人類係確確實實嘅「演化異類」。
．本書以廣東話寫成，作者用自己最熟悉嘅言語，同讀者一齊以「科學、神話、哲學」三個層面，去思考人生嘅存在意義……
「我必須強調，我並唔係唔喜歡或認為書面語有咩問題，只係我思考嘅語言並唔係書面語。無論我見到咩形式嘅中文表達，我個腦都會將佢自動轉化成廣東話。哲學本來已經唔容易，如果可以去除一層嘅語言障礙，或者能夠令閱讀廣東話嘅你，對哲學有多一分嘅親切感。胡適話：『我手寫我口。』講到尾，都係要人閱讀同思考可以毫無間隙咁串連。我非胡適，而我想做到嘅係『我手寫我心』。我希望文字可以成為純粹嘅工具，將你我心思連結。」── 牛哥＠《牛哥講經》／本書作者
「活喺最孤獨嘅時代，我要點樣面對人生嘅荒謬？」
某個星期一，十六歲嘅間生返到屋企，發現書櫃有十五封老豆寫畀自己嘅信。
「神存唔存在？」
「人生意義喺邊度？」
——信件由呢兩條古老嘅問題開始。
但老豆嘅解答方式並唔尋常，佢將問題扭轉，詢問：
「會唔會有一個神唔存在 ∕ 神存在之前嘅世界？」
「演化過程中，人類係幾時開始詢問人生意義？」
原本虛無飄緲嘅問題，霎時有咗解答嘅曙光。
不過，迎接曙光之前，就要墮入無光嘅深淵。
老豆首先要間生承認人生係必然孤獨、荒謬，
呢種感受，
竟然係源自被現代人遺忘嘅星空。
跟住信件，間生閱讀唔同學科嘅經典作品，
由科學、神話到哲學，慢慢拆解荒謬嘅三層——
・科學——
霍金話，人只係「化學渣滓」；
呈現出「一充塞無盡之冷酷與荒涼之宇宙」……
・神話——
以海德格、精神分析詮釋伊甸園神話，
解構人類初次意識到荒謬嘅經歷……
・哲學——
二千年前中國文化經歷過兩次「上帝已死」，
以主體性哲學回應荒謬……
你，喺星空底下，
準備好同間生一齊，打開第一封信，
由荒謬走向自由未？
